Alternativa u ishrani: KOJIM NAMIRNICAMA MOŽEMO DA ZAMIJENIMO MESO?
Posted by: Aura Redakcija
in NUMEROLOGIJA
Ljudi se odriču mesa iz različitih razloga. Neki to čine iz etičkih razloga ili drugih ličnih uvjerenja, dok neki to moraju da urade iz zdravstvenih razloga. Neka istraživanja sugerišu da konzumiranje crvenog mesa može povećati rizik od gastrointestinalnih i srčanih bolesti.
Bez obzira na razlog odbijanja mesa, veoma je važno osigurati da imate dovoljno proteina u svojoj ishrani. Možete ih pronaći u alternativama mesu, a mi ovoga puta otkrivamo koje su najpopularnije.
Tofu
Tofu je zamjena za meso i po svojoj konzistenciji sličan je siru. Dobar je izvor proteina i kalcijuma i sadrži sve esencijalne aminokiseline koje su potrebne čovjeku. Tofu je takođe svestran i ima vrlo blag ukus, tako da s njim možete da kuhate gotovo sve, jer će poprimiti ukus onoga s čime ste ga kuhali. Neki ga koriste umjesto jaja ili ga dodaju u vruća jela poput supa i čorbi.
Tempeh
Tempeh je tradicionalna indonežanska zamjena za meso na bazi soje. Tempeh ima nekoliko ključnih razlika od tofua. Proizvođači prave tempeh od cijele soje, a ne od sojinog mlijeka i koriste postupak fermentacije. Tempeh ima suhu teksturu, a neki proizvodi od tempeha sadrže mješavinu pasulja ili žitarica. Budući da sadrži pasulj, tempeh nadmašuje tofu u vlaknima i proteinima, a odličan je izvor vitamina B6 i magnezijuma. Takođe sadrži prebiotike i probiotike pogodne za crijeva koji potiču iz procesa fermentacije. Tempeh možda nema istu svestranost kao tofu, jer je njegov ukus jači. Tempeh je takođe pogodan za upotrebu kao zamjena za meso sa roštilja.
Seitan
Seitan je napravljen od pšeničnog glutena. Tokom proizvodnog procesa skrob se uklanja iz pšenice, obično ispiranjem vodom. Ovim postupkom dobija se namirnica sa visokim sadržajem proteina teksture slične piletini. Seitan ili tzv. “pšenično meso” nije bezbjedan za ljude sa intolerancijom na gluten. Neki seitanski proizvodi sadrže druge sastojke, poput mahunarki ili začina. Seitan je bogat proteinima, riboflavinom, niacinom i vitaminom B-6.
Biljna hrana bogata proteinima
Neke integralne namirnice, poput pasulja, sočiva, leblebija i pečurki, sadrže proteine ili su mesnate teksture i mogu dobro da zamijene meso. Međutim, samo nekoliko biljnih namirnica sadrži sve esencijalne aminokiseline – uključujući heljdu, kvinoju i soju.
Broj pregleda:
11
2021-03-19
Aura RedakcijaOriginal Article
